پی ٹی سی ایل، ٹیلکو انٹیگریٹرز اور کاسیفک سیٹلائٹ کے ذریعے ٹیلی کام سہولیات کو توسیع دینے کیلئے پُرعزم

انقلابی سیٹلائٹ خدمات پاکستان میں رابطوں کے فروغ میں کلیدی کردار ادا کریں گی

کراچی : پاکستان ٹیلی کمیونی کیشن کمپنی لمیٹڈ (پی ٹی سی ایل)، ٹیلکو انٹیگریٹرز پرائیویٹ لمیٹڈ ،اور کاسیفک براڈبینڈ سیٹلائٹس گروپ (Kacific) نے ایک اہم مفاہمتی یادداشت پر دستخط کیے ہیں، جس کا مقصد پاکستان بھر میں ہائی اسپیڈ سیٹلائٹ انٹرنیٹ، براڈبینڈ، اور وائس سروسز کی توسیع کے لیے مشترکہ اقدامات اُٹھانا ہے۔

یہ شراکت داری پاکستان کی متنوع جغرافیائی اور انفراسٹرکچرل ضروریات کو مدِنظر رکھتے ہوئے مربوط کنیکٹیویٹی سہولیات فراہم کرنے کی غرض سے قائم کی گئی ہے۔ پی ٹی سی ایل کے مضبوط ٹیلی کمیونی کیشن نیٹ ورک، ٹیلکو انٹیگریٹرز کی تکنیکی مہارت، اور کاسیفک کی جدید سیٹلائٹ ٹیکنالوجی کے ذریعے ایسی قابلِ بھروسہ، کم قیمت اور قابلِ توسیع براڈبینڈ سہولیات فراہم کی جائیں گی جو پاکستان کے پسماندہ علاقوں میں ڈیجیٹل ترقی کے فروغ میں معاون ثابت ہوں گی۔

اس سلسلے میں پی ٹی سی ایل اپنا بنیادی ٹیلی کمیونی کیشن انفراسٹرکچر فراہم کرے گا، جس میں خیبر سے کراچی تک پھیلے ہوئے سب سے بڑے فائبر کیبل نیٹ ورک کے علاوہ ، سمندری کیبلز شامل ہیں جو پاکستان کو دنیا سے جوڑتی ہیں۔ ٹیلکو انٹیگریٹرز، کاسیفک کے مقامی سروس فراہم کنندہ کے طور پر خدمات انجام دے گا، اور پاکستان بھر میں سیٹلائٹ سے چلنے والے انٹرنیٹ، براڈبینڈ اور نیٹ ورک سروسز کی تنصیب اور آپریشن میں معاونت فراہم کرے گا۔ شراکت دار مشترکہ طور پر کاسیفک کی براڈبینڈ سروسز کو ٹیلی کام آپریٹرز، کاروباری اداروں، اور چھوٹے و درمیانے درجے کے کاروباری اداروں (SMEs) تک پہنچائیں گے، جس سے ملک بھر میں قابلِ بھروسہ کنیکٹیویٹی تک رسائی میں اضافہ ہو گا۔

اس موقع پر اظہارِ خیال کرتے ہوئے پی ٹی سی ایل کے گروپ نائب صدر، کیریئر سلوشنز بزنس، عامر اعجاز نے کہا، ''یہ شراکت داری پاکستان بھر میں ڈیجیٹل کنیکٹیویٹی کے فروغ کی جانب ایک اہم سنگِ میل ہے۔پی ٹی سی ایل ٹیلی کام اور ڈیجیٹل سہولیات سے محروم علاقوں میں موثر سروسز فراہم کرے گا ، جس سے سماجی و اقتصادی ترقی اور ڈیجیٹل شمولیت کو فروغ حاصل ہوگا۔''

کاسیفک کے سی ای او ،کرسچین پاتورو کا کہنا تھا، ''پاکستان میں ہماری خدمات کی وسعت کاسیفک کے اس بنیادی مشن کی عکاسی کرتی ہے کہ موجودہ ڈیجیٹل دور میں کوئی بھی مفید ٹیلی کام و ڈیجیٹل سہولیات سے محروم نہ رہے۔پی ٹی سی ایل اور ٹیلکو انٹیگریٹرز کے ساتھ مل کر ہم سیٹلائٹ کنیکٹیویٹی کے ذریعے حقیقی تبدیلی لا سکتے ہیں۔''

ٹیلکو انٹیگریٹرز کے سی ای او، امتیاز احمد لغاری نے کہا، ''جدید ٹیکنالوجی کو مقامی ضروریات سے ہم آہنگ کرنا اور صارفین کے لیے مفید سہولیات میں تبدیل کرنا ہماری اصل طاقت ہے۔یہ اشتراک ہمیں زمینی مہارت کے ساتھ اعلیٰ کارکردگی والی سیٹلائٹ سروسز فراہم کرنے کا موقع دیتا ہے، جس سے پاکستان بھر میں کنیکٹیویٹی کو زیادہ قابلِ رسائی اور قابلِ اعتماد بنایا جا سکتا ہے۔''

یہ اتحاد پاکستان میں مقامی طور پر قابلِ استعمال سیٹلائٹ سہولیات کے ذریعے تکنیکی ترقی کو فروغ دینے کے تینوں اداروں کے مشترکہ عزم کی عکاسی کرتا ہے۔ چونکہ پاکستان کی نصف سے زیادہ آبادی کو قابلِ بھروسہ براڈبینڈ سہولیات تک رسائی حاصل نہیں، اس لیے یہ سروسز پاکستان کے ڈیجیٹل خلا کو کم کرنے اور دور دراز علاقوں، کاروباری ، اور سرکاری اداروں کو براڈبینڈ کی سہولت فراہم کرنے میں کلیدی کردار ادا کریں گی۔