18 ٹریکٹروں کی پہلی کھیپ ازبکستان پہنچ گئی، زرعی مشینری کی تیاری، ٹیکنالوجی کے تبادلے اور وسطی ایشیا میں کاروبار بڑھانے کے لیے تعاون پر اتفاق
لاہور، پاکستان میں نیو ہالینڈ ٹریکٹرز بنانے والی کمپنی الغازی ٹریکٹرز لمیٹڈ (AGTL) نے ازبکستان میں اپنی پہلی برآمد کے ساتھ نئی منڈی میں قدم رکھ دیا ہے۔ کمپنی نے 18 ٹریکٹروں کی پہلی کھیپ ازبکستان پہنچا دی ہے، جبکہ اوزآٹو انڈسٹری جوائنٹ اسٹاک کمپنی کے تحت کام کرنے والی ایگرو ٹیک کلسٹر کے ساتھ اسٹریٹجک شراکت داری کے لیے مفاہمت کی یادداشت پر دستخط بھی کیے ہیں۔
مفاہمت کی یادداشت پر تاشقند میں الغازی ٹریکٹرز کے چیف ایگزیکٹو آفیسر یاسین سیکر اور ایگرو ٹیک کلسٹر کے جنرل ڈائریکٹر الغبیک متکاریموف نے دستخط کیے۔ اس موقع پر الغازی ٹریکٹرز کے اعلیٰ حکام کا وفد بھی موجود تھا۔ معاہدے کے تحت دونوں ادارے کاروباری سرگرمیوں میں توسیع، ٹیکنالوجی کے تبادلے، زرعی مشینری کے فروغ اور نئی منڈیوں تک رسائی کے لیے مل کر کام کریں گے۔
اس شراکت داری کا مقصد ازبکستان کے کسانوں کو قابلِ اعتماد اور مسابقتی قیمتوں پر ٹریکٹرز اور زرعی مشینری تک بہتر رسائی فراہم کرنا ہے۔ ایگرو ٹیک کلسٹر کی تکنیکی ٹیم نے 18 ٹریکٹروں کی پہلی کھیپ کا جائزہ لیتے ہوئے ان کے معیار اور کارکردگی کو سراہا اور انہیں وسطی ایشیا کے زرعی حالات میں استعمال کے لیے موزوں قرار دیا۔ اس جائزے سے دونوں اداروں کے درمیان تعاون کے امکانات کو تقویت ملی۔
معاہدے کے تحت دونوں کمپنیاں کاروباری حجم بڑھانے، سرحد پار تجارت کو فروغ دینے اور جدید زرعی مشینری کے شعبے میں ٹیکنالوجی کے اشتراک کے امکانات کا جائزہ لیں گی۔ اس کے علاوہ پاکستان میں کپاس چننے والی مشینوں اور کمبائن ہارویسٹرز سمیت جدید زرعی آلات کے شعبے میں مستقبل کے مواقع بھی تلاش کیے جائیں گے۔
دورے کے دوران الغازی ٹریکٹرز کے وفد نے، جس میں چیف ایگزیکٹو آفیسر یاسین سیکر، چیف کمرشل آفیسر اظہر نور اور سینئر مینیجر ایکسپورٹس محی الدین ربانی شامل تھے، اوزآٹو انڈسٹری گروپ کے ڈپٹی چیئرمین ڈاکٹر داورون خدویاتوف سے بھی ملاقات کی۔ ملاقاتوں میں ازبکستان اور وسطی ایشیا کی دیگر منڈیوں میں تعاون بڑھانے، زرعی مشینری تک رسائی بہتر بنانے اور خطے میں غذائی تحفظ کے فروغ کے امکانات پر تبادلہ خیال کیا گیا۔
الغازی ٹریکٹرز کے چیف ایگزیکٹو آفیسر یاسین سیکر نے کہا کہ یہ شراکت داری کمپنی کی بین الاقوامی ترقی کے سفر میں ایک اہم سنگِ میل ہے اور علاقائی شراکت داروں کے اس اعتماد کی عکاسی کرتی ہے جو وہ کمپنی کی مصنوعات کے معیار، قابلِ اعتماد کارکردگی اور صلاحیتوں پر رکھتے ہیں۔ انہوں نے کہا کہ ایگرو ٹیک کلسٹر کے ساتھ مل کر زرعی شعبے کو جدید بنانے اور وسطی ایشیا کے کسانوں کے لیے طویل المدتی فوائد پیدا کرنے کے لیے کام کیا جائے گا۔
الغازی ٹریکٹرز کی ازبکستان میں پہلی برآمد پاکستان کی برآمدی منڈیوں میں توسیع، وسطی ایشیا کے ساتھ تجارتی و صنعتی روابط مضبوط بنانے اور پاکستانی زرعی مشینری کو بین الاقوامی منڈیوں تک پہنچانے کی جانب اہم پیش رفت ہے۔
ایک تبصرہ شائع کریں