قومی ہیرو ارشد ندیم نے پیرس اولمپکس میں جیولین تھرو میں گولڈ میڈل حاصل کرکے پاکستان کو اولمپکس مقابلوں میں 40 سال بعد طلائی تمغہ دلایا، جس کے بعد ان پر انعامات کی برسات ہورہی ہے۔ جبکہ وزیر اعلیٰ خیبرپختونخوا کا کہنا ہے کہ سرکاری خزانہ انعامات دینےکیلئے نہیں ہوتے۔
واضح رہے کہ منگل کے روز پاکستانی اتھلیٹ ارشد ندیم کو وزیر اعلیٰ پنجاب مریم نواز نے بھی بڑے انعامات سے نوازا۔ مریم نواز نے میاں چنوں میں ارشد ندیم کے گھر جاکر انھیں 10 کروڑ روپے کا چیک پیش کیا۔ اور ساتھ ہی ہنڈا سوک کار کی چابی بھی انھیں پیش کی جبکہ گولڈ میڈلسٹ ایتھلیٹ کے کوچ سلمان اقبال بٹ کو بھی پچاس لاکھ روپے کا چیک دیا۔
دوسری طرف وزیر اعلیٰ خیبرپختونخوا علی امین گنڈا پور نے پشاور میں میڈیا سے گفتگو میں کہا ہے کہ سرکاری خزانہ انعامات دینے کیلئے نہیں ہوتے۔
گولڈ میڈلسٹ ارشد ندیم کو انعام دینے کے سوال پر علی امین کا کہنا تھا کہ 'سرکاری خزانہ ہمارے باپ کا پیسہ نہیں'۔
اپنی بات کو آگے بڑھاتے ہوئے انھوں نے کہا کہ ارشد ندیم کو سرکاری خزانے سے انعام نہیں دوں گا، اولمپک گولڈ میڈلسٹ کو ذاتی حیثیت سے انعام دوں گا۔
خیال رہے کہ وزیراعظم محمد شہباز شریف نے بھی منگل کے روز پیرس اولمپکس 2024 میں پاکستان کو 40 سال بعد گولڈ میڈل جتوانے والے قومی ہیرو ارشد ندیم کو ملاقات کے لیے بلایا۔
ایک تبصرہ شائع کریں